روايه روووعه

بنززل لكم هاذي الرواايه
واتمنى انها تعجبكم
الروايه بعنوان: جددي فيني حياتي باللقاء

جددي فيني حياتي باللقاء ..
الفصل الاول
"جددي فيني حياتي باللقاء"
اتصل ابو حمد بحمدوكان حمد توه راجع من الشغل
حمد:هلا ابويه
ابو حمد:شحالك ياحمد
حمد:بخير فديتك...اصبر ابويه اشوي
ابو حمد:خير ياولديه شعندك؟
حمد:ماشي فديتك بس زحمة سير ..الحين الكل عاطن من الدوام وانته اتعرف زحمة بوظبي
ابوحمد :ماعلينا متى الييه ؟
حمد:ماظن يابويه الاسبوع هذا بايي
ابوحمد:افا ليش؟
حمد :بعد اشغال
ابو حمد:بس انا اباك ياولديه في موضوع مهم.
حمد:خير يابويه شو صاير
ابو حمد:ماظن التيلفون ينفع ياولديه
انا اباك عنديه عشان اكلمك بالموضوع
حمد:والله يابويه ماقدر اتحرك الا على الاسبوع الياي..خبرنيه انته وانا اسمعك
ابوحمد:اوعدنيه ماتسكر التيلفون في ويهيه لين اخلص.
حمد:افا يبوحمد انا اسكر في ويهك
ابوحمد:تراك قد سويتها من سنتين
ابتسم حمد:عدك تذكر ..السموحه يابو حمد ..المهم عطنيه اخبارك انا وصلت وكلي اذان .
ابوحمد:حمد انته سمعت عن اخويه ابو راشد ؟
حمد:الي هو اخوك بالرضاع
ابوحمد:هيه واكثر من اخو
حمد:اسمعك يابويه بلاه عميه بوراشد
ابو حمد:عمك مرقد في المستشفي من اسبوعين وحالته ماتسمح له ايعيش وايد
حمد:لاحول ولاقوة الابالله ..شوفيه تبانا انسفره برا
ابوحمد:ياليت ان السفر بيرد صحته جان سفرناه بس الدكاتره قالو مافي امل ..المهم ياولديه الريال حياته منتهيه خلاص واللي ذابحنه اكثر شي همه على بنته الي مالها حد في الدنيا عقبه ..ياولديه انا ماريده ايموت شال همها وديه ايموت وهو مرتاح
حمد:وشو المشكله يابوي
ابوحمد:عمك كان وده ان بنته تتزوج قبل لايموت لبنيه في سن زواج وماتتخيل كيف اهو ايحاتيها
وايحاتي عند منو بتقعد عقب مايموت
حمد:انته تباها اتعيش عندنا؟
ابوحمد:اكيد انها بتعيش عندنا ترا ياولديه مالها حد غيريه
حمد:انزين وين المشكله انا عايش في بوظبي الموضوع هذا شاور فيه اميه وخواتيه لانها بتعيش عندهن
ابوحمد:اسمعنيه ياحمد مايصير انيبها وانعيشها عندنا بس على اساس انيه عمها بالرضاع
حمد بدا يتنرفز من الموضوع لانه شك بالي ايريده ابوه:ابويه اخلص عليه شوالمطلوب منيه ؟
ابوحمد:اباك تملج عليها..
حمد:شو؟؟؟؟
ابوحمد:ياولديه الله يرضى عليك هيه بس ملجه.. اريد اخويه ايموت وهو مرتاح
حمد:يابويه الله ايهديك انته تدري براييه من قبل انا عرس ماريد فكونيه من هالسالفه الله ايخليكم..مافضيت بوظبي الا من كثر ماتحن اميه عليه ابها
ابوحمد:احنا الحين مانتكلم عنك ..ولانريد انحل الك مشكله.. انا اريدك الحين في خدمه وعنك ماعرست
حمد:طالع واحد غيريه
ابوحمد :انا ماعنديه حد غيرك ..وبعدين انا اريد لبنيه تي اتعيش عنديه ماعنديه حل غير الي قلته لك
حمد:وانا اسف ..واسف بعد لانيه بسكر التيلفون طوط طوط طوط
ابوحمد:سودالله ويهك من ولد
استمرت بعد ذلك محاولات ابوحمد مع حمد عشان يرضخ لطلبه وكان حمد رافض بالمررره
كلمته امه وحاولت معاه وقالت له بان ابوه وايد متضايق وهامنه اخوه ليموت قبل مايتطمن على بنته وان ابوه قال لو ايموت اخوه وحمد ماطاع ايسوي الي قاله له مابيسامحه طول حياته
حمد: ياالله ياميه مب حاله هذي
الام:ياولديه تراها الاملجه بس ..عشان الريال ايموت مرتاح
حمد:اي راحه هذي تراه ميت ..الراحه بتخفف عليه الموت ..شوفي انا بسوي الي ايريده ابويه بس ملجه ..غير الملجه لا وكم شهر وبعدين بطلق
الام:الله يرضى عليك ياولديه ..بقول لبوك وبرد عليك
احبرت الام ابوحمد وقالها خليه الليله يضوي يملج وعقبها يتوكل...

في المستشفي كانت امل واقفه في المطبخ التابع للقسم الخاص الي ابوها فيه بعد ماشافت فوج ريايل داخلين على ابوها وكانت معاها الخدامه
الخدامه:ماماه زياده في ريال وفي واحد بعد شيخ مطوع
دمعت عيون امل من كثر الخوف على ابوها لانها حاسه بقرب اجله
الخدامه:ماما مافي صيح ان شالله شيخ سوي قرايه مشان بابا بعدين يجي تمام
مسحت امل دموعها :ان شاالله
بعد ربع ساعه دخل ابوحمد على امل المطبخ وقال الها بسالفة الملجه ..اول شي عارضت لاكنه يوم قال الها عشان ابوها يرتاح اذا مات.. انفجرت بالصياح هداها وقالها ان الموت ارحم له من العذاب الي عايشنه وانها بتكون مثل وحده من بناته ..المهم كل شي صار بسرعه الملجه والاحداث الي صارت بعدها
حمد رفض ايبات عند هله وفضل يرجع بوظبي لان اهله من سكان منطقة العين كان مزاجه معكر على الاخر ..في اليوم الثاني توفى ابو امل وهومرتاح ومطمن على بنته ..الخبر وصل حمد وانصدم يوم عرف ان خالة امل الي ساكنه في دبي شلتها معاها .. طبعا قامت القيامه على ابوحمد وامه
حمد:انا انا تستغفلونيه في الموضوع هذا واتقولون اليه ان مالها اهل بس علشان اتسون الي تبونه
الام:استهدا بالله ياولديه وهد اعصابك
حمد:اي اعصاب هذي الي تبينيه اهديها انا اليوم بروح المحكمه وبطلق
الام:لاتتهور ياحمد باي شي بتسويه اول شي اقعد مع ابوك وافهم امنه السالفه وانا والله مادري ان عندها خاله
حمد :ماعليه انابجار عندكم ومابروح لين اخلص هذا الموضوع
الام:اتحمل على عمرك ياولديه
‏*‏*
الجزء الثاني ...
حمد ماحصل مكان يرقد فيه غير الصاله الصغيره الي الكل يجتمع فيها للاكل والجلسه كانت عباره عن جلسة تكيات وفيها تلفزون حصل لحاف في الزاويه الي ورا الباب وحط راسه ونام
اول ماوعى الصبح رفع اللحاف شوي عن ويهه وشافها قاعده وفي حضنها ولد صغير اتاكله وانتبه لسفره الفطور عدالها
حمد"وليييييه انا شمرقدنيه اهنيه "نزل اللحاف عشان ماتنتبه له امل وقعد ايفكر "اظاهر انها بتم طول الوقت جداميه "رجع كشف اللحاف شوي لاكنه ماشافها قام بسرعه ولبس كندورته الي كان رامينها عداله ولقط تيلفونه والبوك والسويج حطهن في مخباه وتوه بيطلع كانت اهيه في ويهه ومع بعض مشو خطوه لليمين بعدها خطوه لليسار وقفت امل وردت خطوه للخلف وخذت خطوه لجنب كانت عيونه مركزه عليها وهو ايحس بالتوتر يرجع له
مانطقو باي كلمه اتخطاها وراح على طول للحمام الي جنب الصاله
اما امل استغربت من نفسها ليش ارتبكت من نظراته "هذا منو وليش انا كله اتصادم معاه يستحسن اني اروح الغرفه وتم فيها لين ايروح
التقى بعدها حمد بامه وخالته وقعد معاهن على الفطور وخذتهم السوالف والسوال عن الاحوال طبعا بدون ماتتجرا وحده منهم تيب طاري امل
الام:هاه ولديه تبانا انسوي لك غدا
حمد:لا فديتج انا في خاطريه مجبوس حمام باروح اصيدليه كم وحد وتراكن معزومات على المجبوس انتن بس اما الشله الباقيه ياويلهن لو ايقربن الجدر
ضحكت خالته وهيه تتذكر سالفه
الخاله:انته عدك تذكر السالفه
الام:اي سالفه
الخاله :هذي شما بنتيه الصيف الي فات شلة جدر حمد الي مسوين له فيه مجبوس حمام واحنا رادين بوظبي
حمد :والله من القهر هذاك اليوم دعيت عليها بويع البطن
الخاله :والله انها كملت يومين تشتكي من ويع بطنها
حمد:تستاهل والمره هذي نبهي عليها ماتقرب من الجدر
الام:خاف ربك ياحمد في خواتك ولا انته نسيت ان خالتك مرضعتنك مع سلمى
حمد :مع سلمى هب مع هذي السعره
ضحكت الام والخاله وقام حمد واسترخص منهن عشان ايروح ايصيد الحمام
بعد ماراح
الام:ياالله بسترك مادري شو بنسوي معاه الحين لو يدري بامل اهنيه
الخاله:ليش هومايدري ابها ؟
الام:لا لويدري بيتم قاعد عندنا بتشوفينه راكب سيارته وراد
الخاله :وهو ليش معترض على العرس
الام:شدرانيه به.. ربعه ثلاثه عرسو وطلقو وجن الموضوع معقدنه مادري عاده هم شوقالو له
الخاله :ماعليج امنه اكيد انه يوم بيشوفها بيغير رايه مشاالله امل فنانه بالزين وبالاخلاق
حمد:على الله هو يستاهلها مانريد نظلم لبنيه
الخاله: ياحافظ عليج تراها حرمته الحين الله بيوفقهم ان شاالله
بعد ساعتين خلا البيت من الخاله والام الي راحن لزيارة احدا القريبنات وسلمى الي خذت ولدها ومعاها وحده من خوات زوجها اما بقية البنات فكانن في سابع نومه من سهرت البارحه على واحد من الافلام الهنديه
ظلت امل كلعاده بروحها حست بعطش وراحت للمطبخ ودخلت للستور الي تابع له شربت ماي وعند طلوعها اصتطمت بحمد الي كان ماسك بيديه حوالي عشر حمامات طاح بعضهن على الارض
حمد:السموحه يابنت الناس انتي دوم في ويهيه
امل :لاماعليه
نزلت امل للارض وحملت الحمام الي طاحن
حمد:خليهن بتخيسين ايديج دم
امل :ماعليه
حط حمد الحمام على طاوله في لستور وحطت امل الباقي عدالهن
شافت امل حمد وهو اينتف ريش الحمام
امل:ايبلك سطل فيه ماي
رفع حمد نظره الها وكان بدون سفره وكندورته خايسه دم
حمد :زين
اختفت امل عنه ورجعت يايبه سطل ماي وكيس زباله كبير حطت السطل على جنب وحطت الكيس جدامه
امل :نتف الحمام في الكيس عشان مايخيس الريش المكان
ابتسم حمد وهو ايحط الحمامه في الكيس والفكره عاجبتنه
ولفت نظر امل سرعته في نتف الريش عن الحمام وحطهن في سطل الماي الي منعتها من الحركه كانت اطالعه بذهول من سرعته
خلص والتفت الها وانتبه لذهولها من حركاته نزلت نظرها عنه تحت وتوها بتروح
حمد :بما ان ايديج خايسه دم شرايج تمسكين اليه الحمامه عشان اقطعها
امل:طيب
مسكت امل بطرف الحمامه وقعد حمد ايقطعها
فجئه رن تيلفون حمد واتوهق كيف ايرد
ترك السكين ومسح يده ورد على الاتصال بينما امل مسكت السكين وكملت التقطيع
حمد:هلا اخ جمال .......الحمد لله تمام اخبار المعامله الي قلتلك عليها .....لا طبعا سجلها باسميه حمد سيف ال........
من الصدمه ووقع الاسم امل قصت يدها بدون ماتحس
امل:اااه
تركت امل السكين وتوها بتروح مسكها حمد من يدها المجروحه
حمد :اوكيه جمال اخليك الحين
سكر حمد عن جمال :شوهذا الي سويتيه؟
امل:ارجوك
سحبت امل يدها عن يده
حمد:شبلاج خليني اشوف يدج
امل :لا لا مايحتاي جرح بسيط
حمد:اي بسيط والدم هذا كله
امل :هذا دم الحمام عن اذنك
خلته وطلعت بسرعه لاقرب غرفه سكرت الباب واخذت اتحاول اتهدي دقات قلبها "هذا حمد معقوله ياربي شوالي ايصير اليه شكله ماعرف انا منو؟ وانا والله مش عارفه وين الله حاطنيه" ..
¤¤
الجزء الثالث.......
على المساء كانت الساعه عشر ونصف كانت بعض البنات قاعدات برا في الحوش في المكان المعتاد ويسولفن كلعاده وقف حمد سيارته ونزل وركضت له شما بنت خالته
شما:حمد طالبتنك طلبه قول تم
حمد:لامش تم
شما :حمد حرام عليك قول تم
حمد :شو طلبج
شما :اول قول تم
حمدوعيونه اتدور بين البنات لين استقرت عليها وهو مش حاس بنفسه:امرنا لله تم
شما :ودنا الدكان
حمد:لا والله اي دكان هذا الي فاتح الحين ؟
شما:ياسلام كلها الدكاكين فاتحه الحين والهنود صافين طابور جدامه ايتابعون فلم هندي
حمد:انتي قلتيها بنفسج جدامه طابور هنود عاده الحين الفلم لاعب دوره فيهم ويوم بيشوفنج بيخطفونج
شما:عادي خلهم يخطفوني وانته سو عمرك البطل وانقذني
حمد:ترانيه عطيتج ويه زياده
شما:انته قلتليه تم
حمد:باجر بوديج والحين ممكن اتروحن تيبن اليه عشا
شما بغيض:والله احنا هب مسؤلين عنك انته ريال متزوج وخل حرمتك تنفعك
صرخ عليها حمد:شمااا...
وعيونه على طول راحت لامل الي كانت منزله راسها اطالع تحت
انتفضت شما من صرخته
شما:لاتصرخ عليه جذيه
بعدها قامت وراحت لداخل
البنات بعد قامن وانسحبن الا امل الوحيده الي تمت حمد استغرب انها ماراحت
رفعت امل نظرها وتلاقت نظراتهم امل :ايبلك عشى؟
حمد:لا.....مايحتاي سدت نفسي هذي الله ايسد نفسها
طالعته امل بنظره اهو مافهمها بعدها قامت:على راحتك
خلته وراحت لداخل
وعلى الساعه ثنتين قعد حمد الي تعود يرقد في الصاله على صياح ياهل قام وطلع لبرا وحصل سلمى وهي شاله ولدها واتحاول اتسكته
حمد:شبلاه؟
سلمى :مصخن وشل صدره تعبان
حمد:اوديج المستشفي
سلمى :وين احنا والمستشفي انرد العين يعني
حمد:لافديتج اهنيه في واحد قريب فاتح ...جهزي عمرج انا بلبس كندورتيه وبشغل السياره وانتي وعي وحده من البنات اتروح معاج اتساعدج على الصبي
سلمى:غثيتك في رقادك
حمد:افا عليج ترانيه خاله لحمار هذا
دخلت سلمى غرفة البنات وحصلتهن نايمات
وقفت عند الباب اطالعهن:ياسلام كل يوم سهره واليوم وانا في حاجة وحده فيكن تخمدن
طلعت امل من الحمام اتنشف شعرها
امل:انتي تكلمين نفسج ولا منو
سلمى:امل زين انج واعيه ممكن طلب امل
امل :امري فديتج
سلمى:تسلمين حمودي تعبان بوديه المستشفي واباج اتروحين معايه
امل :من عيونيه بس عطينيه دقيقه ابدل بدلت امل ولبست عباتها وشيلتها وطلعت وشافت السياره الي بالحوش مشغله معناه ان السيره معاه
ركبت امل السياره
امل :السلام عليكو
حمد:وعليكو السلام
امل:عطيني حمودي عنج
كانت سلمى جالسه جدام لانها كانت حاسه ان حمد مايعرف امل وهي كلبقيه ماقدرت اتقوله
سلمى:جزاج الله خير يديه عورتنيه من الصبح شالتنه
حضنت امل حمودي وقعدت اتلاعبه متجاهله وجود حمد
اما حمد فكان وجود امل معاهم في السياره مسوي جو عنده
كل شوي كان يرفع نظره للمرايه ويشوفها
¤¤

بنززل البااقي بعد ما أشووف ردودكم